Ձկնորսների համար համաշխարհային տոնը սահմանվել է 1984 թ, Հռոմում կայացած ձկնորսության կարգավորման և զարգացման միջազգային կոնֆերանսի մասնակիցների կողմից: Ու թեև ձկնորսությունը համարվում է մարդկանց ամենամասսայական հրապուրանքներից մեկը, ամեն դեպքում այս բնորոշումը հազիվ թե հնարավոր լինի տարածել նաև մեր հանրապետության բնակիչների վրա, որոնց մեծամասնությունը, եթե նույնիսկ զբաղվում է այդ գործով, ապա գլխավորապես անհրաժեշտությունից, այլ ոչ թե վայելքներից դրդված: Եվ թերևս դա է նաև պատճառը, որ մենք ավելի հաճախ լսում ենք «ձկնագողություն» բառը, քան «ձկնորսությունը»: Իսկ ինչ վերաբերում է իրական պատկերին, ապա Հայաստանում արդյունագործական ձկնորսության 90 տոկոսը կատարվում է Սևանա լճում: Սիրողական ձնորսության ծավալներն այնքան չնչին են, որ վիճակագրությունն այդ մասին համեստաբար լռում է: Պատճառները հասկանալու համար կարիք չկա շտապել ու մեր քաղաքացիներին մեղադրել ջրային աշխարհի հանդեպ անտարբեր վերաբերմունքի համար: Պարզապես ուզածդ բնապահպանը կվկայի, որ մեր ջրային ավազաններում այսօր կենդանի ձուկ գտնելը չափազանց բարդ գործ է:
|
.png "English"){kind=small}
